VIJANA TUJIONGEZE

    

1.       Wakati umeshafika, Vijana tukaamka

Tuache kulalamika, Fursa tukazishika

Nguvu tunazo hakika, Tusiwe wa kubweteka

Akili zikatumika, Uchumi bora kuweka.

2.       Vikundi tukaviweka, Kwa umoja tutafika

Tukaenda nakufika, Majembe tukayashika

Kazi sera imefika, Shambani pakachimbika

Ajira zisipotoka, Akili huchangamka.

3.       Mvi hazijatufika, Muda nguvu tukaweka

Kazi tukashughulika, Fedha halali kushika,

Uvivu wa kuamka, Na mwilini kututoka

Vitanda tukavyondoka, Kulitupa nalo shuka.

4.     Tusome sana hakika, Kesho picha tukaweka

Ipo siku itafika, Chuoni tutaondoka

Mambo yakakamilika, Uzembe ukatuvuka.

Tusione tumefika, Vijana tukabweteka.

5.       Sisi tunahitajika, Jamii kuchakarika

Vipaji vikatumika, Na nyimbo zikaimbika

Vitabu tukaandika, Hazina kesho kuweka.

Vilevi mbali kuweka, Mwili wapata kuchoka.

6.     Nguvu nyingi kuziweka, Na kazi kumalizika

Mengine mwili wachoka, Safari kutoifika

Busara nazo kushika, Uzee tukaufika

Kwa Nguvu tunasifika, ni heri zikatumika.

7.       Kituo nimekifika, Nasaha kuzikumbuka

Mvi na zitatufika, Sisi tusipoamka

Muda utatuponyoka, Tusiweze kuushika

Tuache tu kutamka, Vitendo visofanyika. 

Raymond Nusura Mgen.
0766461571/0676559211

Mgeniraymond@yahoo.com/raymondpoet@yahoo.com
 Chuo Cha Kumbukumbu Hubert Kairuki