SUBIRA YAVUTA HERI

      1. Usichoke kusubiri, malenga nawakumbusha

   Usichoke kutabiri, ya kesho bora maisha

   Usiache tafakari, mambo kuyaimarisha

   Uishi na watu shwari, furaha yawe maisha.

      2.  Endelea kupambana, iwe usiku mchana

   Mazuri ukayanena, macho mazuri kuona

   Kama u bado kijana, andaa nzuri hazina

   Usishi mambo ya jana, leo kushindwa kuona.

          3.  Panda mbegu zile nzuri, iko siku utavuna

  Kwanza kuota subiri, zitamea utavuna

  Nawe kama u mshairi, vitunge vizuri vina

  Usichoke kusubiri, mbegu ulopanda jana.

     4 .Uzuri siku zaenda, masaa yanasogea

  Anza maisha kupenda, vizuri kujiishia

  Anasa kutozipenda, hukatisha yako nia

  Hekima itakulinda, itakuongoza njia.

5.Siku ipo vitakuja, leo unavyojifanyia

  Uzuri wakati huja, hata ukisubiria

  Kutimiza yako haja, kujifunza kutulia

  Jenga nzuri zile hoja, ijao kufurahia.

6. Malenga namalizia, subira yavuta heri

  Usache  kung’ang’ania, moyo ule wa saburi

  Utaipata na njia, usipoileta shari

  Vina vimeniishia, mwisho nakata shauri.

Na Raymond Mgeni

0766461571/0676559211

Chuo Cha Kumbukumbu Hubert Kairuki

Mgeniraymond@yahoo.com/ raymondpoet@yahoo.com